pRe-weDdinG pHOtO take 2 影相日

期待已久
今日終於係第二輯婚照影相日
不過今次係香港影
同只不過係studio影
真係冇乜野需要準備
因為要係要十張相
所以下午12點先開始化妝

哩個就係Studio

M Wedding Logo

佢地幫我設計既相(比住幾張大家睇先喇)
而右上角就係佢地為我地設計既wedding logo

雖然得十張相,但都有兩個造型

每張相都影左好多張呢~
係影既過程
聽得最多既就係: '新郎笑多d~!'
同台灣時影相一樣
唐生影相真係木口木面架
係studio影相既好處就係即係可以睇反張相既效果
影得邊到唔好就再影過
最後足足影到六點
好累呀~
不過個過程都好開心
今次要等兩個月先有相睇呢~
好心急呀...

潮褂 oR 傳統褂

係時候搵下D褂
係網上睇到好多有關租褂的資料
有好多人大讚潮褂的獨特之處
於是'的'起心肝打電話去潮褂最出名的Cocoon
接電話既女仔好禮貌
我表明我想book時間去試一試潮褂
佢就問我既big day係幾時
佢一聽到係今年11月12號既時候
竟反應好大咁話:
'嘩!乜你地咁遲呀?好多款都已經冇晒架喇~龍鳯褂就應該冇架喇!
可能得反d'對花褂',唔緊要喇,你都可以過來睇睇先...'
就係咁book左時間後就收左線了
到哩一刻我先發覺
原來我都真係幾遲
所以我決定提早同亞唐生去睇一d唔洗book既店先
選左兩間
'red wedding' &'冠南華'
因為哩兩間都有網友推薦同有潮褂款式
其實上網搵red wedding既地址時已覺得有d奇怪
係太子同尖沙咀都有
我曾經打過電話諗住confirm個地址
點知冇人聽
最後我地決定搏一搏根據網址自己走上去太子睇一睇
點知真係冇左間舖
以我估計佢真係好可能已搬去尖沙咀了
我地最後放棄red wedding
決定去'冠南華'先
'冠南華'出名係傳統的裙褂
當中亦有幾款潮褂
唐生完全唔知乜野係潮褂
當我一試潮褂上身時
唐生就話完全唔得
話我成個妹仔 or 二奶喎
唔係呱~咁即係潮褂唔洗諗喇
最後傳統既褂我都試左唔少
得到唐生同朋友仔既意見後
最後決定租'金五福'

佢地話'金五福'都已係褂后黎架喇~
(係以前來講,越多金線銀線就代表越好,嫁得好喎~
哩件褂后都已算係好多金銀線架喇)
哩一件'金五福'係平腳既
之前試過另一件'金五福'係波浪腳
但因為係'頭褂'既關既(完全冇人著過,第一手係我著)
好新好靚
但價錢都靚成一倍有多呀
所以最後我都係租左哩件平腳既~
都ok喇
最後我放棄左潮褂了...

小記:
係試褂既同時
隔離又係有一對新人試裙褂
聽到佢地big day既日期係11月26號
以為其他人都係差唔多時間租褂啫
但當聽清楚後
原來係明年既11月26號囉~

唔通我地真係好遲?!

oUR weDdinG phOtO liNk

已將部分的台灣婚照放上生活易
有興趣的可以根據以下link去睇睇呢

http://wow.esdlife.com/space.php?uid=17126&do=album&id=15696

婚宴拍攝

終於搵左結婚當日既拍攝同錄影喇
今日我地係 M Wedding 去傾下星期既影相事項時
傾傾下原來 M Wedding都有即日拍攝架!
佢地比左佢地為之前影既product比我地睇
都幾好
其實都無諗住咁早落訂做決定架
但原來佢地黎緊既expro已經會加價
仲要係大幅加價
如果我地而家join的話會比反上次expro價我地
仲送我地朝拍晚播既DVD
其實佢送哩段DVD比我地都已經唔平架喇
佢地同我地講
佢地拍攝既方法係有少少唔同既
係BIG DAY前約三個月
要去佢地既公司傾下我地既rundown
大約係邊到婚宴同簽紙
咁佢地之前就會去當地做一d資料先
甚至影一d pre-photos 係for DVD
再會設計個story board比我地
當中會加入我地自己既原素
例如: 我地既wedding logo等
聽落好似好吸引咁
但其實都唔係我地主要落訂既原因
一路以來都唔想做一隻普通既'成長片段'DVD
我就同佢地傾'成長片段'可唔可以加一D特別既原素落去
例如可以用少許既動畫去表達
佢地考慮左一陣
竟然可以仲唔洗加錢添...
我睇過其他要有差不多既製作
而家咁既價錢真係平左好多
希望最後出來的製作都係滿意喇~

台灣婚照終於到步了

嘩!
今日終於收到相了
等了足足都有半年呢~
點解要咁耐?
話說又真係唔關人事既
我地又唔係話要改好多相
事實係因為每次人地問我地D問題
我地次次都遲遲唔覆人地
所以咪攪咁耐囉!
講反正題
收到相都真係有D驚喜喎
D質素真係比我地想像中還好

大相  x 2
相本 x 2 (127張相)
花絮本 x 1 (30張相)
掌中本 x 2 (40張相)
簽名卷 x 1
謝咭 x 200 張
靚靚提箱 x 3

尋找婚介

有意又好
行行下街冇心又好
真係睇過好多間的婚介
旺角呀,尖沙咀呀...都好多地方了
但睇來睇去都唔啱款
唔係亞唐生唔啱
就係我唔啱
再唔係就係budget唔啱
今日專誠再去搵過
我地去左新世紀既PN
終於睇到一D款係啱我地架喇
個Sales姐姐好有誠意咁比我地試帶過好多隻唔同的介指
終於搵到大家都覺得靚同鍾意既介指
但
大家果兩隻介指係唔同款既囉
我地決定離開個Sales相討下究竟要佢個款定我個款
估唔到既就係唐生竟勁堅持要佢果款喎
仲提議其實兩隻可以唔同款添
其實結婚介指係咪真係要一對既呢~
諗左真係好耐好耐都落唔到決定
最後我地決定...打電話問朋友
兩個朋友既答案大至都係一樣
:哈哈哈(首先當然係笑左我地白痴先喇),其實就無所謂既,
但結婚介指唔係一對既話又真係怪怪地囉...(下減一百字)
就係咁...
最後我就範
買左同佢同款既結婚介指了

睇相好似唔同咁,其實佢地係同款來架!!

pRe-weDdinG pHOtO take 2

係好早以前我係網上就睇到一d同電腦合成既wedding photos
覺得好靚
係網上做左d功課
巿面其實都有好多間哩d公司
左選右選
終於係三月既婚展我地終於confirmed 左了
www.m-wedding.com.hk
(因為婚展價平成$3000)
佢地同平時影婚紗照好唔同
因為係電腦合成既
所以諗得出都可以做到
佢地會為每對新人不同既故事設計唔同既相
係佢地既網頁其實唔係post左好多相出來
之後先知道原來佢地唔想d客人因為鍾意某一張相
就copy反果張相
佢地想為每一對新人都可以有自己獨特既相
所以就只係post好少相出來~

早係4月頭我地第一次上佢地既studio
就同佢地傾計咁講左一d關於我同唐生既故事
係5月頭設計終於完成了
今日就係上去睇設計
由於budget有限
同哩輯係第二輯既婚照
我地只係選左影十張相
包送一個設計Logo比我地
佢地足足設計左廿張既設計圖比我地
我地好快就選左十張相
之後就係試婚紗
本來我地只影十張相
只係包一套婚紗
但亞唐生係咁話我著一條短既婚紗好睇
又叫我試多d其他唔同既婚紗...
但我又覺得婚紗係要長架喎 ~~~
係唔知點選既情況下
最後佢地就好好人咁Free多一件婚紗比我
咁我就有一條長既
一條短既婚紗了

係走左之後
唐生突然覺得有一張佢既單人照設計得唔係太好
想加反多d其他既原素落張相到
所以就打反電話比佢地
希望佢地可以設計過果一張相
佢地好快就咁應承左
下星期六就再去睇多次佢地既設計
(個wedding logo都要改呢!)
同時下星期就到唐生試佢既禮服
好期待呢~

搵mua篇

話晒年尾結婚
仲有幾十萬樣野仲未攪
但都好似唔係好關我地事咁...
雖然大家都懶懶閒
但其實我地都有去過婚紗展睇睇有冇d乜野係可以幫到手既
(事關諗住去搵影第二輯既婚妙照丫嘛~)
就係今年三月既婚展
我地行行下諗住順便睇埋wedding mua
當然有好多間喇
到我地睇到第三間左右
佢地個sales好鬼死好傾咁喎...
我諗都傾左成個幾鐘呀~
唔知係咪傾得太耐
個人好似傻傻地又吽吽地咁
去到最後時
感覺亞唐生好似好buy咁
同時佢地set頭同化妝係分開兩個人
心諗咁可以省反唔少時間喎~
而個$8388既 package包:

新郎 (全日)
新娘 (全日)
伴娘 x 1
媽咪 x 2
親人/朋友/姊妹 x 1 (哩樣係佢死都唔肯減價而送比我地)
一堂'設色'班
仲有唔知乜乜facial

就係咁就落左訂
好鬼突然
簡直就完全冇準備呀~
其實連妝都未試
咁就比左錢...
最攪笑就係原來當時唐生以為我buy
我又以為唐生buy
其實原來兩個都麻麻buy

反到屋企當然那那聲上網睇下間舖d評語喇
但搵來搵去都係得兩年前仲要係麻麻既評語
最初都好後悔自己咁快做決定架
不過係剛剛既星期日
上左佢地公司'設色'
'設色'係佢地其中既一樣service來既
佢地既director足足同我地傾左個半鐘
就佢比d意見我合適乜野顏色& style
應該選d咩婚紗 & 晚裝
我係屬於冬天顏色
佢話褂我要搵多d銀線既
婚紗要搵'A'字型喎
佢地既態度都幾好既
但係咪真係好有用呢就真係見仁見智喇!
不過最最最緊要既呢
就係話如果我試妝唔滿意的話隨時都可以換人
咁個心都好似定d
佢有個專人叫Jenny 係負責我地個case
有乜就搵佢喎~
如果我地選左d衫就send email比佢
佢地會比個director睇睇
再幫我諗個頭飾同化妝應該點整
而家我地book左8月試妝
希望一切順利喇

走果時我又係度諗
其實係我咁鬼懶未搵衫先啱哩個course啫
如果一早搵左衫既,個'設色'未無用?!?!

餅咭

話說我媽咪突然打電話過來
叫我快d買餅咭
我就同佢講唔洗咁急呀
事關應該係婚展買會係最抵喎
但佢好肯定咁話將會加價
事關d麵粉加左70%
唔係呱
70%
佢話我亞姨識人
可以幫我問下喎
一問之下聖安娜原來已經加左價(唔知係真唔係)
咁佢就再幫我問問美心喇
美心好似仲未加價
可以幫我訂
$35一張
其實之前幾錢,原價幾錢
我通通都唔知
不過唔緊要喇~
訂左先喇
我估唔係相差好遠呱!!!
就係咁
我又完成婚禮其中一項工作喇!!

影相篇

諗反起我地一心念住去台灣影相

點知台灣地震

去到婚展

甚至有台灣公司叫我唔好去台灣影相

因為都唔知攪成點

影得唔靚喎！

（後來才知道，個SALES應該係香港既，所以勁SALE我地係香港影）

我地好迷茫，仲諗緊係咪真係應該係香港影既同時

又比左一間台灣婚相公司捉住同我地傾

'Bluebay Wedding'

見到佢D相好似幾啱我地既style喎

傾左好耐

就係個婚展大家都趕住收工既情況

佢又加多左好多好多offer 下

我地落左訂。。。

我自問真係唔係一個好努力既新娘子

好多野都好求其

但結婚影相喎

點都上網睇下D資料喇～

先發現原來bluebay wedding都好出名架

而家我影完反來都有成5個月了

佢地既服務同影出來既效果都令我地好滿意呢～

哈哈～

但因為我地懶的關係

（成日都好遲先覆佢地點改D相，改完後又好遲覆人地OK唔OK！）

Soft copy收到

但hard copy而家哩一刻都仍然未收到相呢～

Kiwi係我地指定係攝影師呢！

酒席篇～

一路忙著新居入‘火’

從三月求婚直到八月我地先有時間去開始著手攪我地既婚禮

還記得第一個婚展

沒有任何特別擇日

一心念住係酒店搵酒席

但原來大部份既酒店都有min. charge

而我地只係諗住擺12圍

所以就大大超出我地既budget了

係無睇過場既情況下

我地最後選左馬會

因為佢既min. charge啱我地既budget丫嘛～

亦都因為馬會既關係

佢未肯定2010跑馬既日期

我地唯有選2日

2010年11月14日星期日係正日

2010年11月12日星期五就係副選

因為唔知星期日要唔要跑馬喎～

直到今年既3月

開始正式著手攪婚禮其他既事

先發覺原來馬會要8月先可以正正式式confirm11月14日OK唔OK

太遲了

如果8月先可以正式confirm日子既話

咁我地好多野都已經太遲

所以係3月時

我地做了最終既決定

選用了10。11。12（10年11月12日）

雖然係星期五晚

但至少其他野可以早少少準備丫嘛～

突來的求婚～

還記得2009年既生日

同男朋友上左山頂慶祝我既生日

佢送左一張附屬咭比我做我既生日禮物

一個好窩心既夜晚

亦都係哩個晚上

我收到佢既求婚介指。。。

佢還將佢求婚既過程錄左呢～

mY bLoG~

距離我既大日子仲有幾個月
決定將我籌備婚禮過程既一點一滴紀錄下來
將來睇反都一定好回味喇

終於開BLOG喇~

距離我既大日子仲有大約半年
仲有好多野要準備
但其實之前已經做左好多野了
場地己經confirm左
台灣既pre-wedding photo都已經影左
當日化妝,租車都已經攪好了
睇到好多人地準備結婚既blog
個個都好認真
好有心機呢~
所以我都決定努力記下準備結婚既過程
d朋友話我好懶呢~
仲有好多野未攪呀
不過而家準備係香港影第二輯pre-wedding photo了
所以我而家開始要努力減肥了~